أحس ياتني رغبة حق القرقر .. وحبي أقرقر عليكم شوي ..

هالفترة أحسني ملخبط، نومي معتفس أنام العصر أقوم بالليل ، أظل قاعد لما أروح الدوام .. أرجع من الدوام أظل شوي ع النت حتى مالي خلق أتغدى وأحط راسي وأنام .. وهذا يومي صاير بالطريقة هذي .. ما احب جذي أبدا لأن عندي (تو دو لست) ولازم أنجزها هالأسبوع .. أتمنى هي اللي تكون الحافز لي عشان أعدل طريقتي في النوم ..

عاد تدرون المشكلة ان مرات هالروتين يخليني أسوي أمور وايد حلوة وأحبها .. لأني لما أقوم بالليل جني باتمان (ما بقول خفاش عشان بمدح نفسي لوول) ما يكون أحد قاعد فتقريبا آخذ راحتي في البيت بدون ازعاج أحد .. حتى ما ارتبط مع أي شخص .. وكذلك لو عندي شغل ما اقدر أسوي لأن كل المحلات مسكره لوول

فعموما .. بتكلم بمقتطفات عن الفترة اللي طافت ..

Read more »

توني راجع من يوريكا .. واشتريته .. اللي بيسألني عن تلفوني القديم الـ C902 بقوله انه يلوع الجبد ، مثل ما رد علي واحد ونبهني عليه .. مشاكله وايد .. شكثر يفصل ويطيح السيرفس فجأة .. ومرات يخرف بدون سبب ..

لكن أمانة الشي الحلو فيه بس بس .. الكاميرا شي خيالي ووايد حلوة .. عشان جذي ما ودي أبيع التلفون .. بستخدمه بس حق التصوير لووول

بدأت من فترة ( تقريبا بعد ظهور الجيل الجديد من لابتوبات الماك ) الحملة الجديدة لإعلانات أبل المشهورة Get a Mac اللي ترد فيها على مايكروسوفت وتبين فيها عيوب نظامها ، بالطريقة المضحكة والحلوة .

في الحملة اليديدة تركز أبل على موضوع الحملة الاعلامية الكبيرة والميزانية الضخمة اللي خصصتها مايكروسوفت لها ، وكيف انها تنتقدهم وتقولهم بما معناه: “إذا عندكم كل هالفلوس ليش ما تضبطون نظامكم أحسن من إنكم تسوقون حق منتج كله عيوب في عيوب ” .

إلى الان نزل اعلانانين .. شاهدوهم ..

Read more »

أعلنت شركة telco KDDI في اليابان ، أنها ستبدأ بطرح سرعة 1 جيجا بايت في الثانية لاتصال الانترنت ابتداء من الشهر القادم !!

المضحك في الموضوع والمؤلم في نفس الوقت .. هو هذه الخدمة القوية تتوقعون جم راح تكلفك ؟

Read more »

بعد خبر انهاء خدمات الممثل جيري سينفلد مع حملة اعلانات مايكروسوفت الفاشلة ، ظهرت المرحلة الثانية من الاعلانات ، وكان عنوانها I’m a PC واللي شخصيا بعد مشاهدتها ، أقدر أقول انها فعلا جيدة ومستواها جدا رائع .

شاهد الاعلان ..

Read more »

خلال رحلة الحداق إلى أم المرادم ، مصاحبة مع معاذ والرومي ، برفقة الاخوة في منتدى أرياق ، صار حادث مؤسف لجهازي  .. انه حاشه ماي ، وفلش واخترب .. بعد محاولات جهيدة لتنشيفه طبيعيا أو صناعيا باستخدام السشوار .. لكن بدون فايدة ، اللي هامني حيل في الوقت الحالي هو الأرقام اللي في الجهاز ، ولا خلاص أنا من مدة ناوي أغير الجهاز  .. المشكلة الحين ان الأرقام محفوظة بذاكرة الهاتف .. ووديته عند جم واحد ومعابل فيه من الصبح عشان تطلع هالأرقام .. وان شا الله .. لو قدر الله ما طلعت ، ابي اي واحد يرد اهني يحط رقمه ههههههههههه

المهم .. الحين أنا أمام الأمر الواقع ، وبودي أشتري تلفون يديد ، ومحتار بين هالاثنين من الاريكسون (مابي احد يقترح علي نوكيا أو غيره) .. أنا يهمني وايد شكل الجهاز ، وما أدور مواصفات وحركات في الجهاز كثر ما انه فيه : ساعة، تقويم، منبه، بلوتوث، وكاميرا تصويرها جيد مو خيالي.

الحين الأول C902 مميزاته : الكاميرا فيه وايد حلوة 5 ميجا وفيه خاصية السايبر شوت (مضاد الاهتزاز) ، وسعره بعد أرخص من الثاني ( الأول 138 ، الثاني سعره 159 ) .

Read more »

قرأت للتو خبر في موقع Mac Rumors مفاده : انه جهة أو هيئة متخصصة في معايير الاعلانات في بريطانيا ، قامت بمنع أحد الاعلانات التلفزيونية عن هاتف الـ iPhone وهي تذكر ميزة الهاتف ، وانه يدعم “تصفح الانترنت” .. زين شنو السبب ؟

ذكرت اللجنة ان هالاعلان يضلل المستهلك أو المشتري بأن هذا الهاتف يدعم تصفح الانترنت والصحيح أنه ما يدعم “تصفح كامل للانترنت” فهو لا يدعم الفلاش أو تقنيات الجافا واللي هي موجودة في أكثر المواقع .

Read more »

شكثر تصير ويانا ، نكون قاعدين بالصالة ولا بالدوانية وتكون حدك ميت من الحر ، واييك واحد بعز الحر جنه شايب “مستبرد” ويبي يقصر على التكييف أو يسكره .. الزبده يخرب عليك الجو لوووول . هذا المكيف أو وحدة التبريد مصنعة عشان السالفة هذي ، تقدر تركبها بنص الغرفة ، وتطلع لك الهواء من أربع جهات مختلفة ، الحلو فيها انك تقدر تتحكم في كل فتحة بشكل مستقل ! سواء انك تقدر تفتح أو تسكر .. أو تغير في درجة الحرارة .. تبيها باردة ولا حارة ..

بصراحة وايد عجيبة ، بس طبعا لازالت مثل ما يقولون حبر على ورق ، ونشوف متى تتصنع ، ونحل أزمة الأخ اللي مستبرد بعز الحر لوووول

شوفوا الصور .. تتوضح الفكرة أكثر..

Read more »

في أول موضوع لي في المدونة ذكرت اني بتكلم عن الـ RSS وأشرحها للي ما عنده فكرة عنها ، التقنية هي ممكن تشوفونها في تلفوناتكم او تشوفون الايقونة البرتقالية اللي في الصورة تطلع وياكم في بعض المواقع والمدونات بشكل اكثر في المتصفح عند الرابط ، وهي ترمز الى ان الموقع يدعم تقنية RSS

بعيد عن المصطلحات اللي ما راح تلخبطكم، بشرح لكم فكرتها ببساطة : احنا لما نتصفح النت وندش المواقع الفكره ان احنا نزور المواقع ونقرا شنو فيها ، الـ RSS العكس ، تخلي المواقع اهي اللي تزورك في جهاز بدل ما تروح لها ، فتقوم المواقع من خلال هالتقنية بتغذية الاخبار او الخلاصات الى جهازك الشخصي ، بعضهم ممكن يرسلك زبدة الكلام ، بعضهم ممكن يرسلك سطرين منه ، بعضهم يرسلك الموضوع كامل لكنه خالي من الصور والملفات ، وبعضهم ممكن يرسلك كل شي !

Read more »

ظهر الاعلان التلفزيوني لجهاز HP TouchSmart PC وشخصيا اشوف ان الجهاز روعة بصراحة وان كنت شخصيا من مستخدمين وعشاق الماك ، لكنه اعجبني واللي ما عنده معلومات عن الجهاز ممكن يراجع هذي المقالة ويقرا المواصفات ، اللي يهمني اكثر في الموضوع الاعلان اللي طلعته HP لهذا الجهاز اعجبني جدا اتمنى تستمعون فيه . Read more »