لعبة جيرز أوف وور في جزئها الثاني .. انتظرتها من أعلنوا عنها بداية هذه السنة ، لأنها بصراحة تصنف عندي من أقوى ألعاب الشوتر التي لعبتها في حياتي ، أتت بأسلوب جديد ومشوق ورائع ، وهي أفضل لعبة شوتر بالمنظور الثلاثي .. هل كانت تستحق كل هذه الدعاية والانتظار ؟
ما بغت توصل !! هاليومين بيكون كله لعب فيه لعب
طبعا ما أفكر أخليها لما العطلة .. لاني الحين بلعبها لوول
وانتظروا المراجعة
ملاحظة: معاذ لما أخلص من السيدي بكسره ههههههههههه
حادثة غريبة بالفعل حصلت مؤخرا ، قامت شركة سوني بتأجيل اصدار لعبة Little Big Planet الحصرية على جهازها PS3 وذلك بعد أن استمع مجموعة من الشباب إلى الموسيقى المصاحبة للعبة ( النسخة التجريبية منها ) وكانت تحتوي على بعض الآيات القرآنية ، وقام الشباب في موقع True Gaming وبطريقة حضارية تماما بإرسال عريضة شكوى إلى إدارة سوني في أوروبا حول هذا الموضوع .
وبالفعل استجابت سوني ! وقامت بسحب اللعبة من الأسواق وتأجيل موعد اصدار اللعبة عالميا ، وقامت بالاعتذار عما حصل ! .. الكلام ان اللعبة يا جماعة الخير جدا جدا مشهورة وعالمية ، وهي مرتقبة من الجميع ، فحتى لو حصل وان المسلمين قاطعوها وامتنعوا من شراءها .. فمتوقع أن تحقق نجاح عريض وكبير ، لكن أتوقع بفعلها هذا كسبت سوني جمهور جديد وبشكل كبير !
اللعبة تصدر في السابع من نوفمبر القادم ، وهي حصرية للاكس بوكس ، في المقاطع راح تقدر تشوف ان الجو هو هو ما تغير بالطريقة المميزة واللي نحبها ، راح تشوف قوة الجرافيكس ، راح تشوف كيف تطور أسلوب القتال وأساليب الاختباء كذلك .. بتشوف أسلحة يديدة ( انا من الحين حاط عيني عليها ) لوووول
شاهد، استمتع .. ترقب وتحسف .. قمة الحماس !
قامت شركة ناينتندو Wii بالتعاون مع موقع YouTube بعرض اعلان عن لعبتها Wario Land: Shake it! التي صدرت مؤخرا حصريا على الجهاز ، قامت بعرض اعلان جدا مبتكر وبطريقة جدا رائعة ومضحكة بنفس الوقت .. استمتعوا ..
أول موضوعي لي بعد العودة ، حبيت يكون خفيف ومو ثقيل ، في الفترة اللي طافت تعاملت مع أحد الكتاب لتصميم أغلفة كتبه القادمة واللي بيطرحها في الفترة القادمة أظن بعد رمضان ولا شي ، بيكونون كتابين الأول (التجربة الانجليزية) عبارة عن مقالات ، والثاني وهو التصميم المرفوض (يوم الحدث) قصة .. عموما
الكاتب كتابه الأول “كويتي من كوكب آخر” يمكن شفتوه بفيرجن ، وهو كاتب عرفته من أيام الثانوية من طرف ولد عمي ، ما قريت كتابه الأول .. كوني ما أحب أسلوب هالكتب … وعلى فكرة أنا ما أسويه له دعاية .. أسوي دعاية لنفسي عشان لما تنزل كتبه تشوفون تصاميمي ^^
صممت له غلاف كتابه الثالث (ثاني تصميم بالنسبة لي معاه) ، واللي كان جدا عاجبني أكثر من شغلي الأولي .. أحسه واصل لقلبي أكثر .. وله معنى وقصة .. الغلاف ما عجبه ورفضه جملة وتفصيلا ، وهذا قهرني شوي .. كنت أتمنى انك تحصل الواحد اللي يقول المثل ويؤمن فيه “عط الخباز خبزه” لكني أتحمل جزء من الخطأ ، ان أتوقع الكثير من واقعنا ووضعنا العربي ، فلازلنا نحتاج الكثير من الثقافة والفهم للكثير من الأمور ..
ما بطول عليكم .. هذا التصميم .. فـ عطونا رايكم : )
اليوم تسربت حلقة ديكستر الأولى من الموسم الثالث ، ما أدري ليش حجمها 500 ميجا ، وفي بعضهم ضغطها وخلاها بـ 200 ميجا .. لما الحيني أحس فيني زحمة بحملها وبخليها .. مع اني وايد متحمس .. بس شكلها بتنطر لما تنزل الترجمة بعد .
..
اليوم شفت الحلقات الأولى من Gossip Girl & One Tree Hill حبيت الحلقتين ، مستواهم وايد حلو ، دايما الأجانب يبهرونك بمستوى الدراما عندهم ، صج انها متروسه كلك وطواله ، بس يجددون وايد بالأفكار .
بجوسب جيرل .. استانست لما رجعوا دان وسيرينا مع بعض ، وون تري هيل استانست لما لوك صار ريال وتحرك وتزوج بيتن ..
..
لاعت جبدي وأنا ألعب GTA IV طولت فيها حييييل .. أنا ما أقول انها مليقه بالعكس تونس ، والمهمات اللي فيها متنوعه ومتجدده ، اللعبه وايد عجيبه ومتعوب عليها صج ، وأظن اني مليت منها ليش ان في ألعاب وايد عندي يمكن فوق الست ألعاب ودي ألعبهم وأجربهم وناطرني أخلص منها .. المشكلة ما أعرف أبدا بلعبة ثانية مدام اني مو مخلص وحده .. خصوصا لو كانت حلوه .. وغير ان مع هالدوام اليديد اكون حيل لاهي ومشغول ومرات تعبان .. ومو قادر اكملها الا وقت العطلة .. وماني عارف متى آخرتها مع نيكو لووول
..
نومي معتفس المفروض ما أكون قاعد هالحزه ..! لازم نايم عشان أضبط نومي .. خلاص يوم الأحد يبدأ دوامي الرسمي ، ولازم أروح مصحصح وبكامل قواي العقلية .. مابي أروح متأخر أو تعبان .. راح أتملل .. وحدي مو شي اذا تمللت .. اووفف
قامت Capcom بعرض فيديو للعبتها المنتظرة Bionic Commando تعرض فيه التطور الذي حصل للعبة من أجزاءها السابقة ، واللعبة من تطوير استديوهات Grin اللي اشتغلوا على ألعاب Ghost Recon لنسخة الـ PC . واللعبة بتصدر بتاريخ 31/10/2008 لكل من XBOX 360, PS3 and PC .
استمتعوا بالعرض المذهل وشاهدوا الفرق ..
أصدرت كونامي العرض الأول من Pro Evolution Soccer 2009 او المعروفه باسم “الدوري الياباني” ، العرض خفيف وما فيه عرض لطريقة اللعب ، لكن من الأخبار اللي طلعت سابقا ان هالاصدار بيكون احسن اصدارات اللعبه وهالشي طلع بسبب الاصدار الفاشل حق السنه اللي طافت اللي خيب آمال عشاق اللعبه - حتى انا ما فكرت اني اشتريها - طبعا تبريرات استديو التطوير ان هالشي حصل بسبب ضغط كونامي عليهم وتسرعهم باصدار اللعبة وهي مو كاملة ، وان من المفروض ان الاصدار اليديد - واللي ما تحدد له موعد اصدار لكنه من المتوقع يكون آخر السنة - اهو بدل الاصدار القديم الغير مكتمل !
بيني وبينكم الاخبار الى الان واعده بلعبة حلوه ، شاهدوا المقطع وشوفوا ميسي وهو يقول براسه لوووول
في حوار حصل مع مخترعي لعبة “Mortal Kombat vs. DC Universe” واللي ما تحدد لها تاريخ صدور الى الان ، قالوا انهم يتمنون فيما لو نجحت فكرة دمج هذي العوالم مثل ما هو حصل في لعبتهم ، انهم يطلعون اصدارات يديده يدمجون فيها عوالم اكثر ‘MK vs. Street Fighter vs. Tekken vs. Virtua Fighter’ ، يعني نتخيل ريو من ستريت فايتر ضد ضد سكوربيون .. بيطلع شي حلو ، وشخصيا ما ودي نسبق الاحداث قبل ما نشوف النتيجة من اللعبة الموجودة حاليا ، وان كان التفكير زين ، ولو شفنا ان اللعبة الحالية صار فيها تطوير من ناحية الجرافيكس العالي وطريقة اللعب والانتقال من مكان الى مكان ، حتى انهم رجعوا الحركات القاضية اللي تكون في نهاية المعركة مثل كا كانت موجودة في الاجزاء القديمة من مورتال كومبات .. شاهدوا المقطع