3eed Routine
Posted in Talking on September 30th, 2008 by Abdullah
روتين العيد ، كلنا عندنا روتين وعادات في العيد ، شلون يبدي وكيف ينتهي ، الساعة جم تقعد ووين تروح وعلى منو بتسلم ؟ ومنو تبي تنحاش منه عشان لا يشوفك لووووول .. وبعد ناس تتصيدها عشان العيدية لوووول .. فيه ناس يبدي عيدهم من بعد صلاة العيد وفي بعضهم من الضحى والبعض من الظهر … حتى لا تستغربون ان فيه واحد من الربع يقول: ان العيد عنده يبدي بالليل والصبح كله نايم !
اهني بتكلم عن روتيني الشخصي .. والمجال مفتوح للكل اللي يبي يشاركنا بروتينه وين يروح ووين يرجع، بسم الله نبدأ :
أنا بقولكم روتيني الاعتيادي .. لكن للأسف انه هالعيد ما سويته كله ، خصوصا ان عيد الفطر دايما يكون نومك معتفس فيتلخبط وياك كل شي .. العادة: أروح أصلي العيد ، وبعد الصلاة أسلم على الموجودين من الربع ومن أهل المنطقة والمسيد ، بعدها وأنا راجع البيت اذا لقيت أحد من الجيران سلمت عليه وباركت له بالعيد .. قبل وأنا صغير أنا وأخوي نمر الفريج كله ندور العيادي نسلم عليهم ونوقف ناطرين يقطون علينا شي .. هالحركة نسويها عشان لما نروح خيطان (عند يمعة الأهل) كانوا عيال خالتي وعمتي يكونون ميمعين أكثر منا .. فندور دخل ثاني لحل هالمشكلة لوووول ..
