كان من المفترض أكتب مراجعتي للفلم من أسبوع تقريبا ، لكني أحس ان فلم مثل هذا يحتاج وقت تتأمل فيه مع نفسك أكثر وأكثر ، خلوني أبدا وأقول اني شفت الفلم مرتين بنفس اليوم ، المره الاولى عشان تاخذ فكرة عامه عن اللي صاير وشنو هالضجه حواليه ، الثانيه تستشربه وتتعمق فيه وباللي صار وتحلل كل حركه ليش صارت ، هالنوعية من الافلام - اقصد اللي تحتاج ع الاقل مشاهدتين - ما تمر علي وايد وهي قليلة جدا ، في افلام تشوفها عشان تمثيل ممثل يسحرك لأبعد الحدود بقدراته الفنية مثل Daniel Day-Lewis في فلم There Will Be Blood ، وفيه عشان القصة والسيناريو وكيف انها ترد لك أمل وشي فقدته في حياتك وتخليك تشوف فلسفه للحياة بشكل بسيط جدا مثل Forrest Gump ، فيه أفلام تستمتع بإخراجها والجو اللي تعيشه بالقصة وكيف تعيشها من خلال الكاميرا مثل فلم No Country For Old Men .

مقدمة بسيطة أهيئها للشي اللي ودي أقوله ، فلم The Dark Knight بلا أدنى شك انه أفضل فلم في سنة 2008 ويمكن أتجرأ وأقول يحتل مرتبة عالية جدا في أحسن ما ظهر في هذه الألفية ، الفلم يجمع بين كل الأمور اللي تتمناها: بداية في القصة والحبكة اللي فيها ، والرسالة اللي تحملها طياتها ، إلى تمثيل رائع يخليك يغير نظرة الناس لشخصية عرفها الناس بشي فيقوم هو ويطلع شي “يديد” ومع هذا الناس تنبهر بهالشي ، طبعا كلامي بلا شك عن الجوكر ، نهاية مع تفوق المبدع كريستوفر نولان في اخراجه الفذ والمتقن لهذا الفلم ، واللي هز عرش ومكانة فلم العراب ، واللي هو الى هذه اللحظة نازله مرتبته عن السابق !

القصة :

فلم الفارس الأسود ما كان فلم للبطل الخارق “باتمان” ، لم يستعرض فيه عضلاته أو يوريك حركاته واكشناته .. او لأ لحظه هالأمور حصلت ! بس ما كانت حول هالمحور ، عرضت القصة “العالم” بأجمعه وما يحصل في الحياة من تنافس بين الخير والشر ، كل هذا كان مجتمع في مدينة “جوثام” ، هذي المدينة اللي طغى فيها الشر وظهر ، شر كان قابع في بعض النفوس ، وتحرك .. وما بقى في مكانه ، وبدأت “حرب البقاء للأدهى” ، هالشي كان بداية محور القصة ، ظهرت رموز الخير بشكل ضعيف ، وظهرت رموز الشر بشكل قوي وظلت تقهر اللي حواليها ، لكن بالأخير شنو صار .. هل فعلا كل انسان فيه من الخير كثر ما فيه من الشر ، وما يحتاج الا دفعة وحده وبسيطه وتحدد مصيره ؟ حبكة هالشي صارت بالفلم .. طبعا بطريقة وايد احسن من اللي انا اقولها ..

Why So Serious?

أشوف انه يستحق مني هالأسطر ، الممثل Heath Ledger هالانسان اللي تفوق على نفسه وقدم منظور يديد لشخصية الجوكر ، بشي فاق الخيال بتمثيله المتمكن ، راح يفهم هالشي أكثر من شاف الجوكر بتمثيل جاك نيكلسون أو حتى من خلال القصص ، بياخذ انطباع جدا مختلف عن اللي تشوفه بتمثيل هيث ليدجر ، يخليك تتسائل بالفعل هل كان هذا هو “الجوكر الحقيقي” طول الوقت اللي كان المفروض ان نشوفه؟ لان بالسابق ما شفنا الا مجرد “مهرج مخبول” يقتل للمتعة وبس.

هيث بين لنا في الجوكر مدى المرض والخبث اللي فيه وكيف انه يسوي أي شي بس ليوصل للغاية اللي يتمناها ، كذلك يبين الألم اللي عاشه في حياته اللي خلاه بالأخير يفقد احساسه ونبضه بالحياة . أشياء كثيرة تحوم حول هالشخصية اللي خلانا نشوفها بنظرة يديدة ومن زاوية مختلفة ، ومثل ما يقول الأخ فيصل ان هيث ليدجر قد ضمن ترشيحه للأوسكار اذا مو فوزه بعد ، واتمنى بالاخير ان محد يقولي ان هالشي احنا نشوفه لان احنا متأثرين بسبب موته ! ولا لان بعض الناس يشوف ان الفلم ما نجح الا بسبب موت الممثل ، اقول ان الاسباب الي ذكرتها فوق وتكلمت عنها ، تثبت جدارة هيث ليدجر وانه يستحق الاوسكار بدون شك وموته ماله دخل في السالفه .

ولا تكتمل الأسطورة :

لعلي في أسطري الطويلة اللي طافت كنت بس أمدح بالفلم ، وعموما ما فيه عمل كامل فلابد من العيوب والمؤاخذات عليه ، فبقول الفلم على قمته وروعته أحسست بأن الكاتب والمخرج كريستوفر نولان ظل محكور في اطار ان هذا فلم سوبرهيرو ، فلا مفر من تطعيم الفلم ببعض البهارات البطولية واستعراضات هوليوود المعروفة ، وهالشي كله تمثل في “باتمان” بدون شك اللي يمكن انا اشوفه انه اكبر عيب في الفلم ، من ناحية لبسه الغبي - بصراحة صج لبسه حده غبي - الى معداته اللي يستخدمها والحركات اللي يسويها ، ولعله البعض يقول شلون او ما تقدر تنتقد شخصية معروفه من زمان وخالصين منها ، لكني أتسائل بيني وبين نفسي وأقول مدام ا الكاتب وصل الى التغيير الجذري لشخصية الجوكر مش بس بجوهر الشخصية بل حتى بشكلها ، كلكم شفتوا كيف ان تغيرت طريقة المكياج وشعر الجوكر وحتى لون البدلة ، وحسب ما قريت في بعض المقالات ان الشخصية الاساسية ما كانت لها أي جروح في الوجه وان اهي سبب وضعه للمكياج على ويهه ، اللي بوصله ان هذا التغيير الكامل اللي حصل لشخصية الجوكر ، ليش ما وصل لباتمان كذلك ؟

من الأمور كذلك وهي متعلقة في باتمان نفسه وحول نفس الموضوع ، هي الامور اللي سواها والحركات البهلوانية اللي صارت يعني ينقز من عماره الى عماره وبعدين يتعلق بطيارة ، ولا “يطمّر” السيارة عشان تحوش صاروخ ، غير حركة السيكل اللي سواها وقلب فيه عند الطوفه “اظن كل من شاف الفلم لاحظها” ، يعني هالامور كلها غبية جدا في الفلم بصراحه او اكشن زايد عن حده هالشي اقوله مقارنة بسناريو وقصة ما تتحمل هالمستوى الرخيص من الحركات ! غير ان تمثيل كرستيان بيل في الفلم كان جدا متواضع يمكن حتى بايخ بدون اي شي يذكر ، هالشي باين في صوته لما يثقله عشان الناس ما يعرفونه ! اللي يخليني اقول بعد شغله غبيه في شخصية باتمان وهي يعني الناس الحين مو عارفينك كلش من حلج قاعد تغير صوتك ، والله شي ما يدش العقل .

الختام:

على كل اللي قلته الفلم يبقى من أروع أفلام السنة ، واذا ما كنت رايح له - عزيزي القارئ- ، روح له وما بتتحسف ، حتى اني شخصيا افكر اروح له مره ثالثه بدون ما اتردد لو واحد قالي يلا بقوله فوقه ، هذا اطول بوست اكتبه وعلى مزاج ، بديت فيه وانا دايخ والحين صحصحت ، وبصراحة اللي وصل لما اهني وقرا كل الكلام اللي كتبته أشكره كل الشكر انه تحمل هذرتي هذي .

This entry was posted on Monday, August 4th, 2008 at 5:27 pm and is filed under Movies, Reviews. You can follow any responses to this entry through the RSS 2.0 feed. You can leave a response, or trackback from your own site.